Сцэнарый свята "Гуканне вясны"

Падрыхтоўка.

1. Развучванне вяснянак.

2. Выраб папяровых птушак і птушак-сувеніраў з мукі і солі. Соль і мука (суадносіны 1:1) замешваюцца ў невялікай колькасці вады да стану пластыліну, з гэтага "цеста" робім маленькіх птушак, можна іх расфарбаваць, калі высахнуць. Птушак робім у час развучвання вяснянак. Папяровыя птушкі ў дзень свята развешваюцца на дрэвы, а цясцяныя мы будзем раздорваць як сувеніры сустрэчным, віншуючы іх з надыходам вясны.

3. За тыдзень трэба наламаць галінкі вярбы і паставіць іх у пакоі ў ваду, каб яны да свята распусціліся.

4. Робім Марэну - ляльку , якая увасабляе смерць, зло. Робім яе з дрэва, саломы, старых ануч.

5. Напярэдадні ці ў дзень свята пячом булкі ў выглядзе птушак.

6. Вырабляем і вешаем абвесткі пра свята ў школе і ў вёсцы.

7. Рыхтуем вогнішча - дзе-небудзь на ўзвышаным месцы. Мы гэта робім у школьным садзе ці ля клуба.

Кожная з гэтых спраў даручаецца каму-небудзь з дзяцей.

Правядзенне свята.

1 этап. Абход вёскі.

Удзельнікі свята, апранутыя у народныя касцюмы з галінкамі вярбы і навешанымі на іх папяровымі птушкамі, з кошыкам булак-птушак, з птушкамі-сувенірамі ідуць па вуліцы. Сустрэўшы людзей ці зайшоўшы ў двор, віншуем іх з прыходам вясны, адорваем булкамі, птушачкамі-сувенірамі. Пры гэтым спяваем вяснянкі, водзім карагоды, гаворым пажаданні здароўя, добрага ўраджаю, дабрабыту.

Пажаданні:

1. На доўгі век, на добры быт!

2. Жыці-быці, жыта звазіці,

Дачок аддаваці, сынкоў жаніці!

3. Быць Вам здаровымі,

Як зімой вада,

Вясёлымі, як вясна-красна,

Багатымі, як восень!

4. Дай табе, Божа, пане-гаспадару і ў каморы і ў аборы!

5. Багаславі, Божа, на жытачка род, на статачка плод,

Людзям на здароўе!

6. Будзь, Ваша, здаровы,

Як рыжык баровы,

Майце торбу грошай,

Жывіце ў раскошы,

Усяго даволі, а бяды - ніколі!

2 этап. Ля вогнішча.

Абышоўшы вёску , дзяўчаты і хлопцы, прыходзяць да вогнішча.

Песня "Вол бушуе"

Вядучая:

Гэй, народ!

Збірайся ў карагод!

Гэй, народ!

Вясна ля варот!

Дзяўчаты-маладзіцы,

Прачынайцеся, падымайцеся,

У святочнае адзенне апранайцеся,

Будзем разам спяваці,

Вясну-красну гукаці!

Песня"Ой, чырачка-пташачка"

1-я дзяўчынка:

Свята песенькай сустракаем,

Вясну весела мы гукаем!

Усе разам: Жавароначкі, прыляціце,

Цёпла лецейка прынясіце!

2-я дзяўчынка:

А зімачку прыбярыце,

Бо зімачка надаела -

Усе хлебчыкі пераела.

Усе разам: Жавароначкі, прыляціце,

Цёпла лецейка прынясіце!

3-я дзяўчынка:

Шчасце-долечку мы гукаем,

Мы зямлю сваю адмыкаем!

Усе разам: Жавароначкі, прыляціце,

Цёпла лецейка прынясіце!

4-я дзяўчынка:

Жыта-жыцейка хай рунуе,

Кветкі-красачкі хай квітнеюць!

Усе разам: Жавароначкі, прыляціце,

Цёпла лецейка прынясіце!

Песня "Вясна-вясна на калочку"

Вядучая:

Абяцала да нас завітаць Вясна - маладзенькая ды прыгожая. Ходзіць яна па праталінах, будзіць зямлю. Дзе яна ступіць - зялёная травіца, весялосць.

Уваходзіць Вясна ў зялёным вянку, вітае ўсіх.

Адна з дзяўчат звяртаецца да Вясны: Памажы, Маці, нам вясну гукаці, зарадзі, Божа, лета цёплае!

Песня "Пумажы, Маці, нам вясну гукаці"

Вясна:

Гэй, народ!

Збірайся ў карагод!

Гэй, народ!

Вясна ля варот!

Дзяўчаты-маладзіцы,

Прачынайцеся, падымайцеся,

У святочнае адзенне апранайцеся,

Будзем разам спяваці,

Вясну-красну гукаці!

Ясь:

Вясна-красна, што ты нам прынесла?

Вясна:

Малым дзеткам - па яечку!

Старым бабкам - па кіёчку,

Маладым жонкам - па сыночку,

Красным дзеўкам - па вяночку,

Маладым хлопцам - па канёчку!

Песня "Дзякуй Богу, што вясна прыйшла"

Вядучы да Вясны:

Вясна-красна, а ці памятаеш, як цябе раней сустракалі?

Вясна:

Ой і весела было! Усе жыхары вёскі выходзілі на высокае месца, раскладвалі вогнішча, спявалі песні, вадзілі карагоды, у гульні гулялі. А на вогнішчы спальвалі Марэну, каб не было сярод нас смерці і зла.

Вядучы:

Давайце і мы вогнішча распалім ды Марэну спалім, а разам з ёй усе хваробы і ўсё нядобрае.

Запальванне вогнішча.

Гарыць Марэна.

Усе разам у карагодзе гавораць рэчытатывам:

Гары, агонь, ты ясна,

Каб Сонца не пагасла,

Каб траўка зелянела,

Каб хутка жыта спела!

Песня: "Багаславі, Божа, Прачыстая Маці"

Пасля гэтага свята працягваецца ля вогнішча гульнямі, карагодамі, скокамі праз агонь.

Карагоды:

"Харашо вясной",

"Ой, у полі-полі пава летала",

"У полі-у полі, гэй, на раздоллі",

"Мядуніца" і інш.

Гульні:

"Грушка", "Цяцерка", "Баяры", "Явар", "Яшчур" і іншыя.

уверх